२०८१ फागुन ५ सोमवार
सम्वाददाता: पूर्ण वि. क.
जाजरकोट । बारेकोट गाउँपालिका भौगोलिक बनावटको विकटता र देशको राजधानी भन्दा दुरदराजमा पर्ने पालिका जहाँ मेडिकल अधिकृत डाक्टर ल्याउन हात पाउ जोड्नुपर्ने हुन्छ। बल्ल तल्ल ल्याएको डाक्टरलाई बारेकोटमा डिउटी गर्न जेल जीवनको सजाय सरह हुन्छ र कसरी फुत्केर जाने भन्ने कुरामा दाउ छोपेर बस्छन् र अवसर पाउनासाथ निस्कन्छन्।
अनेकौं अनेक समस्याहरूले ग्रस्त बारेकोट र बारेकोटी जनताहरुले गुणस्तरीय स्वास्थ्य सेवा पाए, नपाएपनि एउटा दक्ष र विज्ञ स्वास्थ्यकर्मी साथमै भएको भरोसामा विरामीहरुले मृत्युसंग लड्न थप हौसला पाउने श्रोत पनि आज नरहेको अवस्था छ । दु:ख,दर्द,पीडा र छटपटी लिएर विरामीहरू अस्पताल पुग्छन् तर कहिले स्वास्थ्यकर्मी नहुने कहिले औषधी नहुने जस्ता विविध समस्या बारेकोट बासीहरुले भोग्दै आइरहेका छन्।
डाक्टरहरुलाई पैसा कमाउनु छ, अन्यथा पनि होइन किनकि कोर्स अध्ययन गर्दा करोडौं पैसा खर्च गरेका छन् र सानोतिनो तलब भत्ताले अध्ययन गर्दा गरेको खर्च असुल पनि हुदैन तसर्थ राज्यले उचित पारिश्रमिक तलब भत्ताको सुनिश्चित नगरेसम्म यो समस्या यथावत् नै रहने देखिन्छ।
बारेकोटमा डाक्टर टिक्न नसक्नुको प्रमुख कारण यहाँको भौगोलिक विकटता र डाक्टरले चाहे बमोजिमको सेवा सुविधा उपलब्धता नभएकाले डाक्टर बस्न नरुचाएको र अब फेरि छिटै डाक्टर ल्याउन पहल गरिरहेको कुरा स्वास्थ्य शाखा प्रमुख राम बहादुर रोकायले भन्नुभयो।
